Vivimos no mellor momento da Historia para ser muller: temos dereito ao voto e á pílula, e dende 1727 xa non nos mandan á fogueira por bruxas. Porén, aínda quedan moitas preguntas por responder: para que depilar as inguas? Deberiamos usar bótox? Ódiannos os homes en segredo? E por que todo o mundo pregunta cando vas ter un fillo?
Moran aborda con intelixencia, sen tabús e cun gran sentido do humor cuestións do día a día na vida das mulleres, dende o seu punto de vista como feminista e filla dunha familia numerosa e proletaria.
SOBRE A AUTORA
Caitlin Moran (Brighton, 1975) é a maior de oito irmáns e comeza a ler libros feministas para demostrarlle cientificamente ao seu irmán Eddie que é superior a el. Aos quince anos escribe o seu primeiro libro e fai os seus primeiros amigos; aos dezaseis anos comeza a traballar na redacción da revista Melody Maker e aos dezaoito convértese en columnista de The Times.
En 2010 recibe o premio á mellor columnista do ano e, máis tarde, á mellor crítica e mellor entrevistadora. Con milleiros de seguidores nas redes sociais, Caitlin Moran é un personaxe de culto, da que incluso fixeron un moneco de Lego.