Trátase dunha "unidade didáctica" orientada ás aulas de Ensino Medio, nos seus diversos niveis, pero de indubidable interese xeral, particularmente para persoas con responsabilidades sindicais na actualidade que non viviron nin aqueles feitos nin aquela época. Na primeira parte, exponse o contexto das relacións laborais na comarca ferrolán por aqueles anos, con referencias concretas ás empresas BAZAN, ASTANO, MEGASA, PYSBE, HISPANIA, PEMSA e FENYA, moitas delas hoxe desaparecidas e outras profundamente transformadas. Na segunda parte relátanse os sucesos do 9 e 10 de marzo, e os factores que os desencadearon. Un libro que axudará a comprende-la transcendencia de todo o acontecido na comarca ferrolán nos últimos anos. O prólogo é de Cipriano Dobarro, Director da Escola de Graduados Sociais de Ferrol, e a Presentación de José María Bouza Allegue, ex-secretario xeral da UGT na comarca. A autora é Doutora en Xeografía e Historia. 71 páxinas; 22x16 cm.; 12 fot.; Ed. 1.996. ISBN: 84-921045-1-1
