Lamentacións dun prepucio
Tradución do inglés de Rafael Salgueiro
Lamentacións dun prepucio revela episodios da infancia e adolescencia do autor nunha comunidade xudía ortodoxa estricta e rememora a súa rebelión e esforzos por emanciparse, a través da pornografía, a comida non kosher, a marihuana, o furto e a masturbación compulsiva, ata acadar unha vida practicamente laica. Porén, o autor segue crendo de xeito “abafante, incurable e miserable”. Agora que vai ter un fillo, debátese entre cortarlle o prepucio ou esperar algo peor ca a morte.
Comparado en varias ocasións con Woody Allen e Phillip Roth, Shalom Auslander brinda un rico e fascinante retrato dun home pelexando coa fe e a familia cunha mestura de humor e ira.
O autor
A Shalom Auslander (Monsey, New York, 1970) criárono cun terrible respecto por Deus. Na adolescencia seguiu crendo, e tal vez por iso comezou a provocar voluntaria e indiscriminadamente a cólera divina, moi similar á do seu propio pai. Nin sequera a súa estadía en Israel conseguiu devolvelo ao rego. Agora que é adulto e pai de familia, Auslander mantén a provocación mediante a escrita de ensaio e ficción.
O seu primeiro libro de relatos, Beware of God (2005), valeulle un gran recoñecemento crítico, igual ca Lamentacións dun prepucio (2010). Escribe artigos para The New Yorker, Esquire e The New York Times Magazine, entre outras publicacións. A súa última novela publicouse en 2012 co título Hope: A Tragedy.
