A matrioska, a boneca con bonecas no seu interior. Compostela, cidade con moitas cidades no seu interior: a relixiosa, a universitaria, a nocturna, a de barrio, a turística, a política, a traballadora, a funcionaria. E, dentro desas, outras cidades máis, tantas como persoas, tantas como vidas. En Matrioskas, novela coral, descubriremos ao longo dun ano, un ano onde caben moitos anos, a Chloé, Marcial, Fina, Lucas, Sabela, Venceslau... medio centenar de habitantes da aldea máis grande do mundo. Medio centenar de vidas, escenas do seu existir. Medio centenar de matrioskas nun mesmo escenario: Compostela.
