Este é un libro moi diferente a calquera outro que antes leses.
Non se parece en nada a nada, xa verás!
É un libro que fala da maxia de crear.
Son unhas páxinas que explican como, cando todo semella negro…, pode
saír a luz.
Antonio García Teijeiro e Xosé Cobas argallaron este relato, distinto, que
hoxe tes nas mans.
Prepárate para unha viaxe alucinante de palabras e de cor.
... e déixate sorprender…! ANTONIO GARCÍA TEIJEIRO (Vigo, 1952) é profesor, escritor e crítico de literatura
infantil. Galardoado co Premio Merlín por Na fogueira dos versos,
entrou na Lista de Honra do IBBY e concedéuselle o Premio Pier
Paolo Vergerio da Universidade de Padua (Italia), un dos máis prestixiosos de
Europa. Co poemario Arredor do teu corpo gañou o Premio Illas Sisargas, e en
2018 publicou Poemar o mar. Pero estes son só algúns dos moitos recoñecementos
que atesoura. Algúns dos seus poemas foron musicados por grupos de
Galicia e por músicos como Antón Seoane e Paco Ibáñez. Mantén unha intensa
actividade na rede dende o blog Versos e aloumiños. Foi Premio Nacional
de Literatura Infantil e Xuvenil en 2017. En Editorial Galaxia publicou, entre
outros, As catro estacións (1991), Petando nas portas de Dylan (2007), Raiolas
de sol (2016), Bicos e non balas (2019) e Canta, miña rula, canta (2021). XOSÉ COBAS (Logrosa, Negreira, 1953) é pintor, deseñador gráfico e ilustrador. Comezou a principios dos
anos oitenta colaborando en revistas e na prensa diaria para logo iniciarse na ilustración de literatura
infantil e xuvenil. Desde entón ten máis de douscentos libros ilustrados de diversos xéneros. A súa obra
foi exposta en galerías e centros de arte de España, Europa e Latinoamérica. Ao longo da súa traxectoria como
ilustrador recibiu premios, como dous White Ravens da Biblioteca Internacional de Múnic, o Gourmand World
Cookbook Awards de Estocolmo (2004) ao mellor libro de literatura gastronómica en castelán, o FETEN, ao
mellor libro de teatro ilustrado (2002), o Díaz Pardo (2008), o Neira Vilas (2014) e o Premio da Gala do Libro
ao mellor libro ilustrado (2016), entre outros.