Neste libro de Emma Pedreira hai libros que falan de libros que conteñen
libros que nos poden enfermar ou sandar ou sacar o mellor de nós, que
pode ser o peor. Un mollo de relatos, dende micros a máis longos, nos que
a trama e o desenlace se adiviñan entre páxinas, entre lombos de volumes curiosos
para xente así de curiosa: os bibliópatas e fobólogos. Libros polos que matar
e polos que vivir. Libros que dan a vida e a quitan. Personaxes nos lindes da razón
que atopan na lectura, nas letras, nas semánticas máis estrañas, a súa razón de ser
ou un motivo para matar. Unha proposta literaria de Emma Pedreira, unha das
autoras con máis proxección da literatura galega actual.
EMMA PEDREIRA (A Coruña, 1978). Licenciada en Filoloxía Hispánica,
poeta e narradora. Entre a súa ampla produción destacan os poemarios
Xoguetes póstumos (2010), Libro das mentiras (2012) e s/t (2015). Como
narradora, publicou varios libros e en 2016 gañou o Premio Narrativas Quentes
que convoca Edicións Positivas co libro Corazón e demais tripas.
@emma_pedreira.
