A Editorial Galaxia publica Maasai, de Alberto Avendaño, con ilustracións de Xosé Freixanes.
Esta novela, publicada na colección Literaria, trata temas universais como o amor, a guerra ou a maxia dun pobo. A lírica de Avendaño, mestúrase co universo creativo de Freixanes dando lugar a un libro totalmente singular.
Maasai fai referencia á afouteza dun pobo nómade e guerreiro. Estas páxinas transportarán ás lectoras e lectores a vivir unha experiencia única.
Alberto Avendaño baseouse en feitos da historia Maasai e na vida do Laibon Mbatian, o seu líder espiritual, para crear unha rede de historias que observan e cuestionan ao ser humano. A través da retranca máis galega, lévanos ás raíces africanas, a través dunha viaxe que, tamén, supón unha introspección interior.
Algo do que aquí se conta, escoitouno o autor en Mombasa a mediados dos anos oitenta do século XX.
Alberto Avendaño (Vigo, 1957) é escritor e xornalista cunha carreira profesional en dous mundos (Galicia _TVG_ e Os Estados Unidos _The Washington Post), e en tres idiomas (galego, castelán e inglés). Con Antón Reixa e Manuel M. Romón forma parte do Grupo de Comunicación Poética Rompente (1976-1983), vangarda literaria durante a transición democrática española, onde fai colaboracións artísticas con Menchu Lamas e Antón Patiño, así como cos músicos Enrique X. Macías e Julián Hernández (Siniestro Total). Traballou para a RTVGe o CDG, antes de emigrar aos Estados Unidos durante trinta anos, onde a súa obra se recolle en publicacións da Academia Norteamericana da Lingua Española, da que é membro. De regreso a Galicia, Avendaño volve a Rompente cos poemarios Que hostia din os rumororosos? (2021) e CAOSMOS (2022)con Antón Patiño. Autor de literatura infantil (dous Premios Barco de Vapor), teatro e tradutor ao galego de clásicos da literatura en inglés, Avendaño recibiu os recoñecementos máis importantes da prensa hispana dos Estados Unidos, así como tres Premios Emmy™ da Academia da TV estadounidense.
