«O tesouro do Dourado»
Alberto G. Aneiros. Editorial Toxosoutos.
a. s. redacción / la voz
O tesouro do Dourado evoca dende o seu título a epopea dos exploradores e conquistadores á procura do ouro americano. Con este libro gañou Alberto G. Aneiros a pasada edición do certame de relato de aventuras Antón Avilés de Taramancos. O narrador da historia é un galego que conta os feitos acontecidos anos atrás durante unha expedición da que tomou parte. A aventura arranca nos territorios coñecidos como Nova Granada, hoxe parte de Colombia, durante o século XVII e está protagonizada por un grupo de persoas que de xeito clandestino, sen licenza real, emprende a busca do mítico tesouro tan cobizado polos españois en América. Un relato que se move nas coordenadas do xénero, con acción e sorpresas.