Moitas das vilas nas que vivimos hoxe naceron na Idade Media e case todas estaban amuralladas, para defender a veciñanza dos bandidos. As casas eran pequenas e moitas tiñan no baixo obradoiros: zapatarías, xastrarías, ferrarías, fornos etc. Os artesáns e os campesiños vendían os seus produtos na feira que se celebraba na praza principal, onde o pregoeiro se encargaba de dar as noticias, porque non había tele nin internet e case ninguén sabía ler.
