Vida, pensamento e influencias de Simone de Beauvoir son difíciles de sintetizar e transmitir, en parte por unha cuestión de cantidade (é moito o escrito e o falado por ela e sobre ela), en parte, pola multiplicidade de planos que se entrecruzan e mesturan. Esta escritora francesa -atreveríame a dicir, parisiense, "montparnassiana"- viviu de forma moi intensa, mantendo numerosas relacións de amizade, sentimentais, políticas, laborais; viaxando decotío toda a súa vida a destinos de todo tipo, próximos e distantes, a pé, en avión etc.; e explorou a expresión das súas cavilacións a través de canles literarias tamén múltiples (memorias, teatro, novelas, ensaios filosóficos, narracións de viaxes, correspondencia, diarios, entrevistas...) falando -mellor dito, escribindo- unha e outra vez de si mesma.
