Afondando na llinia yá apuntada en dalgunos poemas de Vida privada, Berta Piñán (Cañu, 1962) indaga equí nuna poesía onde les referencies rurales sirven de base expresiva a dellos de los sos temes recurrentes: l'amor, la memoria engañosa y, sobre todo, la perda entendida como l'iniciu del dolor, pero también como'l camino inevitable de la consciencia. Ye una poesía cargada d'ecos: versos que van d'un poema a otru como una melodía de fondu, imaxes y ritmos conteníos qu'escuenden una tensión emocional siempre llena de resonancies. Temporada de pesca supón una apuesta por reincorporar los elementos de la nuestra cultura rural, pero esta vez dende la so pura y primitiva dimensión simbólica.
