Teófilo Edicións quere sumarse, con esta publicación, á conmemoración no mes de marzo do vindeiro ano 2013 do centenario da anexión das localidades de Vilaxoán, Carril e Vilagarcía de Arousa nun só concello.
Ao longo de preto de cento cincuenta imaxes, este libro mostra dun xeito peculiar a realidade dunha cidade que xurdiu da fusión do que hai un século foron tres concellos diferenciados, contribuíndo a espallar os innumerables atractivos que ofrece Vilagarcía de Arousa.
O libro nos somerxe, ao longo dunha sucesión de fermosas imaxes, na beleza desta vila mariñeira que soubo medrar tanto en tamaño coma en posibilidades. O libro mistura imaxes do pasado con outras máis actuáis reflectindo unha colorida sucesión de moi coñecidos lugares que van desde a beleza paisaxística de fermosos recunchos naturais e do litoral ata a fisonomía e a arquitectura con emblemáticas construcción espalladas por Carril, Vilagarcía e Vilaxoán, pasando polo rico patrimonio cultural atesorado co paso do tempo.
“Carril, Vilagarcía, Vilaxoán 99 anos despois” é unha publicación que invita a transitar pola puxante, dinámica e moderna urbe que é hoxe a capital arousana, destacando a súa harmonía e complementariedade, sen esquecer o protagonismo daqueles tres concellos que souberon traballar xuntos e manter as súas costumes e tradicións.
