“Sempre Riveira” mostra, a través de preto de 200 coidadas instantáneas, un orixinal itinerario polos espazos urbanos e tamén naturais que forman parte do cotián tanto de quen reside como daqueles que se achegan a coñecer Riveira. Se trata dunha mirada distinta -captada polo obxectivo da cámara de Alberte Peiteavel- que ofrece toda unha escolma de excelencias que son un orgullo para os riveirenses e un reclamo para o turismo.
O libro convida ao lector a gozar dun xeito diferente dunha puxante vila que ao longo dos anos coñeceu un notable troco no seu desenrolo urbanístico, mudando sobre todo o aspecto da súa fachada marítima, e que continúa a medrar, impulsada polo esforzo de tódolos riveirenses, nos eidos económico, social, cultural e turístico.
Un contido que, desde o percorrido panorámico dos lugares máis emblemáticos da “moi nobre, moi leal e moi humanitaria cidade” de Riveira, se perpetúa a través do sublime instante que supón ancorar a realidade dun entorno ao espazo e ao tempo. Unha proposta para que quen disfrute deste libro pase, nun acto máis pausado, do ollar ao contemplar.