Tradución do inglés de Saleta Fernández
A frecha de Deus é a historia de Ezeulu, o sumo sacerdote do deus Ulu, un home íntegro e cun gran sentido do deber, mais tamén complexo e cheo de ambigüidades internas, que se aferra ao poder que lle foi conferido polo seu pobo e a súa tradición. A súa autoridade, porén, é cada vez máis cuestionada polos seus rivais, polo seu propio pobo e mesmo pola súa familia, no contexto da nova situación creada pola dominación dos colonizadores británicos e dos misioneiros cristiáns, que todo o deturpa.
Cunha prosa elocuente e cristalina, Achebe afonda nesta novela na loita entre a tradición e o cambio, o conflito entre xeracións, a perda da fe, e os límites do poder do individuo nun sistema rexido pola tradición, sempre baixo o influxo da autoridade imposta na Nixeria rural colonial de principios do século XX.
Con este volume, pecha a «Triloxía africana», que converteu a Chinua Achebe en referente esencial da narrativa africana.
O autor
Chinua Achebe foi un novelista, poeta e crítico literario, que naceu no ano 1930 en Ogidi, unha vila de etnia ibo no sueste de Nixeria, e que forma parte da primeira xeración de intelectuais que foron educados na súa patria. Estudou Literatura na Universidade de Ibadan, e traballou durante anos na Radiotelevisión Nixeriana. Exerceu a docencia en varias universidades de Nixeria e os EUA. Traballou como profesor de Literatura no Bard College de Nova York ata o 2009. Faleceu en marzo de 2013. Chinua Achebe, que no ano 2007 recibiu o Man Booker International Prize pola súa carreira literaria, está considerado o pai e fundador da literatura africana moderna e un dos grandes escritores en lingua inglesa do século XX.
