Simon e Peter van de vacacións a Grecia, á casa da súa curmá Penélope. Un día fan unha excursión á praia cun bote inflable. Alí aparece un paquete do que saen unhas voces, e descobren no seu interior unha gaiola, completamente amoblada, coma se fose unha casa. Nela discuten un papagaio e unha araña, procedentes de Mitoloxía, un país rexido por tres libros falantes e por Papagaio, o gardián das palabras. Os tres rapaces axudarán a salvar Mitoloxía do poder dos Basiliscos.
Conta a lenda que a primeira palabra que pronunciou Gerald Durrell (1925-1995) foi “zoo”. O seu pai, un enxeñeiro civil británico destinado á India, morreu en 1928, polo que a familia se viu na obriga de volver a Inglaterra. Entre 1935 e 1939 trasladáronse á illa de Corfú, experiencia que lle serviría a Gerald para desenvolver a súa afección pola fauna e de base para as súas obras, aderezadas cun gran sentido do humor.
