Parafraseando a Spinoza, podo dicir que cando comecei a estudar a inmigración non me propuxen expor algo rechamante nin orixinal, senón expor con detalle aquelas cousas que configuran a vida inmigrante e constitúen o núcleo das súas preocupacións, sen ridiculizar ningunha acción humana, senón tratando de entendelas todas e dando elementos para a súa comprensión.
Aínda que é verdade que o ser humano sempre se moveu dun lado a outro, a mobilidade aumentou moito nos tempos modernos debido á rapidez dos medios de transporte. Nestes tempos, as grandes migracións son forzadas por motivacións económicas, aínda que é o individuo o que aparentemente decide onde ha de ir. Noutros tempos, grandes continxentes de persoas eran arrincadas da súa terra para ser deportadas a outros lugares. Preguntámonos constantemente cara a onde nos están levando a complexidade das técnicas, a velocidade e amplitude das comunicacións, a interacción continua de persoas e institucións e, no noso caso, a densidade e mobilidade da poboación.
Tentarei expresarme coa mesma linguaxe que usaron comigo as xentes sobre as que versa este estudo. Se os emigrantes utilizan unha linguaxe chea de imaxes é porque non coñecen os conceptos e son incapaces de racionalizar a súa situación, ou porque non existen conceptos capaces de apreixar a súa experiencia. Só quero contar o que lle pasa ao emigrante que vai na procura do paraíso.
Autor/a:
Manuel Mandianes
ISBN:
978-84-7824-638-0
Páxinas :
182